DIA DO NA PATUT ULAON DI ARI SABAT LUKAS 6: 6-11

Bagikan di Facebook

Bagikan di Twitter

Unknown Unknown

Tags: #Acara Gereja

Halambohon mangadopi angka roha ni Sibotosurat dohot angka Parise na naeng mamuru Jesus, jala las ni roha dipatupa Ibana tu torop halak marhite na pinamalumna sahalak naung mate tangan siamunna. Alai tutu, si tingki ari Sabat do i diula Jesus. Ido Alana, songon judul ni hatorangan ni turpukta on, ima sada sunghunsunghun “Dia do na patut ulaon di ari Sabat?”. Mansai tangkas do di hita turpuk on, ndang pola maol natusanta dia do alus ni sunghunsunghun i. alai boasa ma pola adong sunghunsunghun ni Jesus taringot tu si? Sian pardalanan ni Jesus, tangkas do tapaihutihutangka pangajarion na nilehonNa. Sai tongtong doJesus mangalo angka hasomalan ni Hajahudion dohot angka pangantusion Hajahudion. Isarana taringot tu parpuasaon (Ay. 16), na martangiang (ay. 5), taringot tu angka na manghaholongi musus, dlna (boi taida di jamita di dolok, Matius 5-7). Turpukta nuaeng manaringoti taringot tu pangantusion Sabat. Molo didok di Hajahudion, ia Sabat i ma na so boi mangulahon manang aha pe di si, didok do i ari paradianan (2 Musa 31:12dst - 3 Musa 24:8 dst, dlna). Lapatanna, mansai ringkot do Sabat i di halak Jahudi songon ari na badia, ari na so boi mulaulaon di si, siala 6 ari lelengna mangula ulaon.

Nian, adong do tingkosna, molo gabe ari na badia ari Sabati i, asa unang Ianggus roha ni jolma mangula ulaonna din a 6 ari. Ai molo gabe mangula do di ari Sabat i, ndang adong be totalitas pamujion di Debata di ari i, holan na manghaporluhon tu dirina nama jolma i molo tong dope mangula di ari Sabat. Hit ape ra, nunga tahasomalhon ingkon maradi sian angka ulaon di ari Minggu, i ma ari parpunguan, parsaoran di bagas joro ni Debata. Mansai sogo do roha marnida molo adong dope na mangula haumana di tinggki ari Minggu, tadok ra “Hira na so adong ari na asing”. Alai aut sugari adong ma na mansai ringkot siurupan, na mansai ringkot sitoguon ala tinggang ibana, pasombuonta do ibana di haporsuhon i, ndang taurupi, ndang tatogu ala tadok naeng pabadiahon Minggu i hita?.

On donanialo ni Jesus sian pangajrion ni halak Jahudi. Pangantusion na ingkon pabadiahon ari Sabat mambahen nasida ndang mangulahon holong ni roha, hape adong do na patut urupan di tingki ari Sabat i. pangantusion na ingkon pabadiahon Sabat, dipangke angka halak Jahudi holan laho mangharingkothon tu dirina, i ma Asa badia ahu di adopan ni Jahowa. Antong ndang adong imbar ni nasida dohot halak na mangula di tingki ari Sabat, ai na tong do mangahut manang mementingkan diri sendiri goar ni i. Ala ni ido, dipaingot Jesus, asa Sabat i, ndang taringot tu diri sandiri, alai Sabat i, ima holong ni Debata do i tu angka na tinompaNa, asa maradian nian, asa unang loja mangahut tu dirina sandiri, asa unang loja dipagosagosa portibi, alai asa adong ma nian parsaoran rap dohot Debata. Antong, holong hangoluan do hape Sabat i, na dipapatar marhite na manghaholongi dongan, manghaholongi na humaliang, (Matius 12: 11-12; Markus 2:27-28; 1 Yohanes 4:11).

Marhite turpuk on, nungan lam tangkas be di hita, “Dia ma na patut ulaonta di tingki ari Sabat?”. Manghangoluhon parsaoran nag ok holong ni roha, i do ianggo na rumingkot di ari Sabat i. Asa molo tung pe taharingkothon parmingguon, partangiangon, unang ma nian ala na naeng “mementingkan” diri sandiri, i ma asa badia didok rohana, asa tama diadopan ni Debata didok rohana. Alai naeng ma nian saluhutna partangiangon, parmingguon, siala na manghamauliatehon holong panarihonon ni Debata, siala naung godang pasupasu tajalo, gabe sagihononta ma i tu angka na humaliang hita, asa rap marlas ni roha ma hita saluhutna di bagasan Ibana. Amen

Sipahusorhusoron

1) Adong do pengalaman ni ngolunta na gabe manadinghon halak na mansai ringkot urupan ala na naeng marminggu nama hita? Boasa ma masa na songon i?.

2) Adong do nah ea masa gabe sundat hita marminggu, ala adong na ingkon urupanta halak na asing? Aha ma pangantusion na boi bahenonta taringot tu si?